Westinghouse компани АНУ-д LEU+ цөмийн түлшний үйлдвэр барихад 1 тэрбум ам.доллар зарцуулна
Westinghouse компани Өмнөд Каролина мужид 5-8% хүртэл баяжуулсан ураны түлш үйлдвэрлэх байгууламж барьж эхэлсэн бөгөөд 2030 онд үйлдвэрлэлээ эхлүүлнэ.
АНУ-ын Westinghouse Electric компани Өмнөд Каролина мужийн Хопкинс орчимд байрлах Колумбийн цөмийн түлшний үйлдвэрийнхээ дэргэд LEU+ түлш үйлдвэрлэх шинэ байгууламж барихад ойролцоогоор 1 тэрбум ам.доллар хөрөнгө оруулахаа зарлалаа. Барилгын ажил эхэлсэн бөгөөд 2030 онд үйлдвэрлэл эхлэх төлөвтэй байна.
Арилжааны хөнгөн усан хөргүүрт реакторууд ихэвчлэн уран-235-аар 5% хүртэл баяжуулсан түлш хэрэглэдэг бол LEU+ түлш нь 5-8% хүртэл баяжуулсан уран агуулна. Компанийн мэдээлснээр ийм түлш даралтат усан хөргүүрт реакторыг түлш сэлгэхийн тулд зогсоохгүйгээр 18 сарын оронд 24 сар ажиллуулах, реакторын чадлыг нэмэгдүүлэх боломж олгоно. Шинэ хүчин чадал нь компанийн AP1000 реакторыг өргөн нэвтрүүлэхэд ч дэмжлэг болохоор байна.
Westinghouse компанийн 5%-иас дээш баяжуулалттай туршилтын түлшний багцуудыг 2025 оны 4 дүгээр сард Жоржиа мужийн Вогтл цөмийн цахилгаан эрчим хүчний станцын 2 дугаар блокт анх ашигласан байна. Эдгээр нь мөн Колумбийн үйлдвэрт АНУ-ын Эрчим хүчний яамны дэмжлэгтэй EnCore хөтөлбөрийн хүрээнд үйлдвэрлэгдсэн юм.
1968 оноос ажиллаж буй Колумбийн үйлдвэр түлшний шахмал, түлшний саваа, түлшний багц үйлдвэрлэдэг бөгөөд 1,200 гаруй ажилтантай.